Xaçmaz regional ədliyyə idarəsi tərəfindən Qusar rayonunda bələdiyyələrin hüquqi maarifləndirilməsi və onlara metodik köməklik göstərilməsi məqsədi ilə seminar keçirilmişdir

Xaçmaz regional ədliyyə idarəsi tərəfindən bələdiyyə üzvləri və qulluqçularının hüquqi maarifləndirilməsi, həmçinin onlara metodiki kömək göstərilməsi məqsədi ilə növbəti seminar Qusar rayonunda baş tutmuşdur.

Keçirilmiş seminar “Bələdiyyə torpaqlarının idarə olunmasında qanunçuluğun gücləndirilməsi, torpaqların təyinatı üzrə istifadəsi”, “Korrupsiya hüquqpozmalarının qarşısının alınması və bələdiyyələrdə şəffaflığın artırılması” o cümlədən “Yerli vergi və ödənişlərin yığılmasında bələdiyyələrin hüquq və vəzifələri” mövzularını əhatə edib.

 Bələdiyyə üzvləri və qulluqçularının iştirak etdikləri tədbirdə Xaçmaz regional ədliyyə idarəsinin rəisi Rasim Məlikov və idarənin əməkdaşları tərəfindən bələdiyyələrə dair qanunvericilikdə həyata keçirilən islahatlar barədə geniş məlumat verilərək, müvafiq qanunvericilik aktlarının müddəaları haqqında çıxışlar səsləndirilmişdir.

Bununla yanaşı, müzakirələr zamanı bələdiyyə üzvlərinin üzləşdiyi mübahisəli məsələlərin həlli, vergilərin yığılması və bələdiyyə mülkiyyətində olan torpaqları zəbt edən şəxslərə qarşı qanunvericiliyə uyğun tədbirlərin görülməsi ilə bağlı seminar iştirakçılarına tövsiyələr verilib.

Tədbirdə iştirak edən bələdiyyə üzvləri və qulluqçularını maraqlandıran suallara aydınlıq gətirilərək müvafiq cavablar verilmişdir.